BUANNEL RAMDAI

Mizo hla lungkai leh ngaihthlak zawng pawha lung ti leng vang vang thei, ram lam tui mi leh ram vachal deuh tan phei chuan han ngaihthlak zawng pawha a hmuna a hruai delh delh thei khawpa hla rilh leh tha “Buannel Ramdai” tih hla hi Pu Ch.Malsawma (L)in a phuah a ni a, he hla a phuah dan an sawi naah chuan Putar pakhat a vanglaia Pasaltha em em thin in a chanchin a sawi a, chu chu he hla phuahtu hian hla mawi taka halo chan tir a, mizo ten hla kan neih zinga hla ro tling tak tur a rawn chhuah theih phah ta a ni. Pu C.Vananga’n mawi tak maiin a sa hlarh hlarh thin anih kha.

Chu In bathlarah chuan Putar sam tuak var vau tawh chuan  meizal zuk vang vang pahin an ral leh lama tlang leh mual mai tak in khawh zui mai chu a  mitin a tlin tawk tawk chu a thlir vang vang a. Romei zam chiai maiin tlang leh mual a bawm chiai te chuan a lung a ti leng em em a, a mithlaah a that lai huna a ram vahna te alo lang uaih uaih a, thing lian pui puiin a siam ngaw chhah tak tak te chu suangtuahna nasa tak nen a thlir vawng vawng a, pasaltha huaisen leh ngeng ngalh mai tan chuan chu aia a lung ti leng  leh a kal chakna chu a awm lo a ni.

Chutia ram lam a thlir vauh vauh lai chuan an In chhunga a nupui tar ve tawh tak mai chuan a la deh tur a buaipui rak rak a, “Nu-i thingpui min rawn pe teh” tiin tuk thuan eikham chhawl hal dawmna turin an nu hnenah chuan thingpui sen hang chu a lam a, nu ber chuan tap chhak zawla thingpui lum bel ung khak tawh mai atang chuan thingpui sen fim ralh mai chu a thli chhuak kerh kerh a, zawi te tea kal hnak hnak chungin pawn bathlara a pasal thu chu ava pe a. An nu thingpui rawn pek chu an lem khalh a, chutih mek lai chuan an veng pasaltha pakhat ram chuan tur silai pu va va chunga ram lam pan tum chu a  rawn kal hnak hnak bawk a, bathlar atang chuan “Khawi lamah nge” tiin alo zawt var a, chu pasaltha chuan “nimin lamah kan lo ral ngawah saza hram raih raih ka hria a, ka va chhui zui ange” a ti a, “Ekhai, chu ava nuam dawn vele aw, va kap ngei teh khai” a ti charh charh a, tichuan chu pasaltha chuan ram lam pan chuan a kal liam san ta a. Chu pasaltha kal liam tur thlir vauh vauh pah chuan  a suangtuahna ramah bawk chuan a cheng zui leh a, an vanglaia ngaw leh ruam a sa hnu an chui charh charh lai te, thui tak tak ramhnuaia an vah lai leh sa an kah dur dur lai te chu a mithhla a lang zui uaih uaih a, a lunglen a belchhah nasa hle a, mahse khang hunlai kha tunah chuan a tan chuan a liam tawh si a ni.

A thutna a tang chuan an ding tial tial a, a kut leh lam chuan bathlar ban chu a dawn a, leh lama thingpui no dawm ran chung chuan an kawngka lu chunga sa lu chi hrang hrang a tar tlar thut mai te chu a thlir vauh vauh a, sa lu chi hrang hrang chu a mal te te chuan chik taka en chungin a kah hunlai te an hlim dar dar thin zia te a ngaihtuah chhuak a lunglenna chuan a bual nasa tulh tulh a, mahse tih theih em em a nei tawh silo. Ngaihtuahna leh mitthlaa thlir dauh dauh chu a tih theih tawk chu a ni ta der mai.

Chung a lunglenna leh a khawharna hnem turin ram ngaw dur chhah tak tak hnuaia silai pu chunga ram vah te, thingkung sang tak tak atanga  sa han chan leh te chu chak ve sa teh mahse, a ban vun chuar leh nem dar tawh mai a thlir atang chuan a taksa in tlin tawh loh zia a hre chiang em em a, a rilru in chak leh mahsela a taksa chakna te chuan chung ram hla tak tak han kalpui leh tur chuan a zo tawhlo ani. Hui pap pap chung chuan a thutnaah chuan a thu leh ta riai riai a.

Ngaihtuah chuak thut niawm tak hian an khum lam chu a pan charh charh a, khum lu lama hun rei tak alo tun tawh a silai leh sa tam taka lo chhun hlum tawhna a fei tliang hlarh mai te chu ava la chhuak a, an nu chuan “Engti zia nge khang te i va lak chhuah” alo ti a, “a khawhar thlak e mai, kan ti fai mai mai ange” tiin bathlar lam chu a pan chhat chhat a, an nu chuan a alo en zui deuh deuh a, a pasal chu a lunglen dan a hriatthiam pui em em a, engmah sawi zui lemlo chuan a thil tih ngai bawk chu a chhunzawm leh mai a.

Chu putar a vanglaia pasaltha em em mai, sa lu eng enge maw zat lo la tawh chuan a thutna pawn bathlarah chuan a silai leh a fei chu a mal chungah dah chungin a chulh hauh hauh a, khang ram hla tak tak leh ram ngaw dur pui pui te, lui lam a kal changa lungpui chunga in intha zo taka a zuan kai thauh thauh lai te chu liam tawhin  hmanlai alo ni ve ta der a. Tunah chuan putar alo ni ve ta der mai tih te chu a ngaihtuah kai ta zel  a, ram ngaw dur pui pui mai leh chhah tak tak hnuaia a hah ve changa thli thaw a dawn heuh heuh thinna te chu tunah chuan a tan han kal phak chi zia zang a ni ta lo. Vanglai ngai tak chung chuan an khum lam chu mu hahdam turin mittui parawl kuang kuang chung chuan a pan ta a.

1.Romei zamin tlangtin mualtin,
   A bawm chiai e lunglen an;
   Rairah riang val khawchuan nuam an,
  Tlangtin mual tin a dum dur e.

 A saw raltiang lentu zobawm saw,
Chhingmit titlaitu tukloh ram chhah kar saw;
Mi ngeng pasaltha lung ti leng tu,
Buannel ram dai lungdumtu.

2. Chhuihthang vala ram tuan ni chuan,
    Ka dawn kir thin kan vanglai;
    Hnuchhui thiam an sahrang chhuiin,
    Kawi tin ruam tin a hrut vel thin.

3. Ka lungdamna tukloh ramdai,
    Fang leh thei hian ka mawi lo;
    Theih zawng ni se hrut leh in maw,
    Chengrang chawi a fan ka nuam e

4. Tunah zawng maw hai ang tar in,
     Vanglaini te an chuai ta;
    Buannel ramdai kawlva lenchham,
    Lai fei chul in ka thlir vawng vawng.

A Va Mak Em

Sipai Lammual kotlang lam thutna atang chuan Santosh Trophy Mizoram Champion Team chu  theihtawpin kan lo au ve tuarh tuarh a, kan thian zaho chuan kan phur ve hle mai. Mipui kan tam bawka, kan ri nuaih nuaih mai a, a kotlang lamah ngat phei hi chuan kan in pawlhsawp nasa em em mai a. A tlai tual tuala boruak lah chu a tang tual tual emaw tih mai tur hi a ni. Kan thutna hma chiah ah hian, tlangval pathum hi an thu ve a, an inchei dan leh an hmel en chuan Biak In lam ai chuan Zodin velah zawng ila kan hmu hnem zawk ang tih chu a chiang reng mai a. An kut te lah chu khuai zukna emaw tih mai tur hian a vung lian hlawm em em a, a sen tul mai a. An thawmhnaw te lah chu khua a vawh tehlul nen kekawr bul leh tawnzau chiah an ha a, rawmawl bal ve lam tawh tak mai hi a kekawr hnung lamah chuan a ti lang chhuak tut a, an banah chuan eng sign ber nge pawh hriat loh tattoo hi a awm nuaih mai bawk a. Kan hma chiaha thu anni bawk a, an lang chiang em em a, an au nasa em em a, nula hmeltha deuh lo kal lah chu an lo chhaih ve hman ziah a, mahse mite tana han ninawm tur leh huat tur chuan an awm silo. Fiamthu maksak deuh deuh hi an thawh a, an bul vela mi chu min ti nui dur dur reng mai a, keini pawh chuan kan hlimpui khawp mai.

A hnu deuh ah chuan an zinga a cher ber, ka lam hnaih bera thu chuan a kekawr chu a zen ruk ruk a, saranga thil in pack hi ala chhuak a, a seh hawnga, a ei ri ta ruap ruap maia, an bul vela mi chu kan ei ve duh leh duh loh zawtin a rawn chawi kual vel a, ka’n enchian nak chuan savun kan puah hi alo ni a. “Ka ei lo mai ange” ka lawm e tiin ka lo chhang mai a, chiang tak chuan min en a, kei lah chuan ka lo en kar mai si a, a mit chu ala sawn vat a, field lam chu a en leh ta vang vang a. Keipawh chuan field lam chu hawi thlain Vanlalsailova zai chu ka lo zawm ve rut rut a, ka thiante ho lah chuan kan hma ami te lam leh an lo zai ve vak vak chu an lo nuih nghek nghek mai a, anni lah chu an phur ang tulh tulh a. Ka lam hnaih bera thu savun rawn sem kual tu kha chu a savun ei riap riap pah chuan a thu a, engemaw ngaihtuah niawm tak hian a savun ei lai chu muangchang hian a thial niau niau a. Kan thianpa pakhat chuan kuhva chuan ei tumin a siam nuap nuap a, chutih lai chuan kan hmaa thu te zing ami chuan hawihawm tak hian “ Thianpa, khawngaihtakin min lo pe ve teh a, ila nei em?” tiin a rawn dil a.

Thianpa Ruatfela lah chuan a lawm hlawm em avang chuan “Nei tehreng mai, kha  tiin a bawm chuan a pe thla a, i thiante pawh khan an duh ve lawm ni” a ti zui nghal zat a, chupa chu a fiamthu thiam ber kha ani bawk a, “duh ve lo ang, keima tan chauh alawm ka dil che, ka pe phawt che anga, an duh veleh an dil tha ve leh mai dawn che ania” tiin a han fiamthu zui nghal zat a, chutah a thianpa lah lo duai bik lo an han inkap leh rih, min va han tihlim the reng em,  field lam pawh kan hawi thla hman meuh tawh lo chumi te ho chuan min tih hlim em avang chuan an fiamthu ah chuan ka nui uarh uarh mai a. Kei chuan Cigarette chu ka han tan a, “ kha in duh ve em?” tiin ka zu pe ve a, savun sema chuan rang taka lo la in “khawi keiman ka duh, hetiang nei te chu a hma khan lo sawi daih tawh tur che alawm” tiin min han fiam zui ve nghal zat bawk a. Midang pawh chu ka pe ve ta a, kan va han hlim dar dar tak em. Chutia hlim taka kan awm lai chuan hriat loh chhungin programme chu alo zo ta der mai a. Field atang chuan kan chhuak ta a. Kan haw kawng ah chuan thianpa  Ruatfela chuan “vawiin chu lawmna leh nuihna hlir alawm mawle” a ti a, midang pawh chuan kan nuih hnem zia sawiin kan nui bawk bawk a, tichuan kan inthen darh ta a.

Tum khat chu kan thianho chuan chaw eikhawm kan rawt a, kan thianpa nunmawia te In tuikual ah eikhawm tur chuan ka ti ta a. Mahni hna atangin chawhnu lam chawlh kan la theuh a, tlai lama kan siam tur chawhmeh vel chu leiin kan bazaar a, kan duh tawk kan lei hnu chuan kan thianpa te in lam chu kan pan a. Nunmawia chu a nu in a tirh avangin SBI main Branch ah chuan a kal lawk a, chumi chhung chuan keini ho chuan Lammual Gate bul motor parking ah chuan motor dahin motor ah chuan kan lo nghak thap a. Eng eng emaw sawiin kan lo ti ti nak nak a, chutih lai chuan kan thlanglam SBI luhna bul footpath chu Ruatfela chuan kawkin “En teh u, khu kan thiante kha, hman zana lammuala min ti hlim deuh tu te kha a ti a, kan hawi thla nghal thap a, kan nui thu hlawm a, an pathum bawk khan an lo la ni a, an incheina pawh a ngai ngai khan alo la ni ta zel a. Ruatfela chuan “an va han hits hlawm tak e aw” a ti a, kan nui dar dar a. Chutia kan thlir thap lai chuan mipa nga vel hi an bulah chuan an rawn ding a, an rawn hnek nghal ta pawp pawp mai, anni ho chu lei ah chuan an thal hawn hawn a, chumi te ho lah chuan an pet zui bawrh bawrh mai a. Chutah savun min sem tupa khan  thei leh theilo in min ngaihdam rawh u tiin ngaihdam a dil tawk tawk a, chutih lai chuan pakhat chuan dimna tel miah lo hian a hmai ah chuan a pet zui chawrh mai a, lei ah chuan a thal nghal thuai a. “ Ehee” kan ti rual thawt a,  motor atang chuan kan thianho chuan kan chhuk nghal vek a, an bul ah chuan kan tlan thla vat a.

 Enge thil  awmzia tiin thelh kan tum a, chutih lai chuan chungho zinga pakhat chuan “ In lo inrawlh ve a tul lo ang” tiin pawr tak hian a rawn  ti a. An hmel ka han en thin a, rawlthar chhuak tir chauh an ni tih chu a chiang em em mai a, mahse an thang duang ve hle ang tih chu an pum rua atang chuan ka hrethiam nghal a. Kan thianpa Zuala chuan “kan inrawlhna tur a awm kan ti lo, enge thil awmzia kan ti mai alawm” a ti sak a. An zinga a upa ve deuh hmel ber chuan “ In hriat a tullo ang” tiin an mi sawisak te chu rawn khawih zui a tum a, chutah le  ruatfela thinin a tuar ta lo “ Kan hriat a tul, naupang te te lehnghal in va chaltlai reuh ve mawle” a ti a. An zinga pakhat chuan “Hnek zel rawh u, a ti a”  “ Hnek zel lo ang,  i va pawr ve nang hi, lo kal teh”  tiin a awm ah chuan ka tham nghal a, chu veleh midang chuan “kan thianpa i khawih elaw” tiin min rawn tham a, ka thiante ho chuan anni ho chu an lo tham ve bawk, kan insual chu ani ta der mai a, a rem lai laiah chuan kan inhnek ta chawrh chawrh mai a. Mi chuan min en thup tawh mai si, an naupanna a la lan bakah an rui ve duh avang chuan min hneh lo lam deuh chu a ni a. Kan bula bike ding te chu kan ti tlu phung mai a, chutih lai chuan patling rual deuh deuh chuan min rawn pawt sawn hlawm a. Thil awmzia min zawh mek lai chuan Police ho chu an Van nen an rawn thleng ta rup mai a. “Enge heng laiah buaina in siam”  tiin min tham nawk nawk a, kan vai chuan an motor ah chuan min khung ta phiarh mai a. Nunmawia chu chutih lai chuan bank atang chuan a rawn chhuak chiah a, phawk tak hian “eheee, ngati nge a”  tiin police ho chu a zawt a, Police ho lah chuan “buaina an siam” an ti a, min kalh khum nawk nawk a, min tlanpui ta daih mai a. Kan thiana te ho pawh chu an na vial ngul ngul chung chuan an thu ve ran a, an hnar vel chu a thi per pur hlawm a, chutiang bawkin an mahni sawisa tu ho pawh kan lo khawih ve hman nual aniang, an vung ber bur hlawm a, keini lamah chuan zuala chu a hmui a vung deuh lak a, midang chu kan hliam lutuk hlawm lo.

Police Station kan thlen chuan Police Inspector pakhat chuan thil awmzia leh kan in tih buai chhan min zawt a, kei chuan felfai takin thelh kan tum thu leh an lo pawr zui tak em avanga tum lo deuh chunga in ti buai kan nih thu ka hrilh a. Ka thusawi te ngun taka a ngaihthlak hnu chuan kan bula mite chu thil awmzia chu a zawt ve nghal bawk a, kan thiana te chuan an bialnu te chhaih ah a sawisa tute hian an puh ve ngawt thu leh annih loh thu an sawi mawlh mawlh pawh chuan an rinhleh tlat avangin an zu zel a, Zodin ah khan an inrin loh laiin an khawih tak thut thu an sawi ve bawk a. A sawisa tute zinga a pawr ber (keimah ngei pawhin a awma ka tham kha) chuan “Nangmah ngei anih kha tiin ka bula ding (Savun semtu kha) a rawn kawk siah siah mai a. Chutih mek lai chuan Inspector chuan vin takin “ Ka la zawt lo che, lo ngawi rawh” a tih tuarh a, tichuan a ngawi zui ve nghal a. Inspector chuan keini chu min rawn kawk in “ anih leh anni hi eng vanga lo insualpui ve ngawt nge in nih a” tiin chupa chu chiang taka melh chungin a zawt a. Chupa chuan “ An rawn in rawlh ve ringawt anih kha” tiin  a chhang a, “ Ngah nge an rawn in rawlh loh ang, nangni aia u te zawk daih an nia, thil awmzia zawh che u an tum a, in lo tibuai chhunzawm alawm” tiin Inspector chuan a chhang a. “ Nangni ho hi chu kan la kawl chhunzawm ang che u” tiin an vai chuan a din khawm tir a, keini lam chu rawn hawiin “nangni erawh chu thiam lohna in nei lo e, in kal thei tawh ang” tiin min hrilh a. Thil awmzia hrethiam turin Inspector chuan hawihhawm takin min hrilh a, keini pawh chuan kan hriatthiam em em thu in kan chhang a, tichuan Police Station chu kan chhuah san ta a. Kan chhuah dawn chuan kan thiana te zing ami chuan “Thiante u, kan lawm e aw, min rawn pui a” nui sung chung hian ala rawn ti fan a. Keini chuan nui thu chung chuan kan lo en thap bawk a.

Police Station  kawt ah chuan Nunmawia chuan min lo nghak vang tawh a, lo nui hui chung hian “ enge thil awmzia ni re re a” alo ti a, ruatfela chuan “ ngawiteh, helai hmun hi chhuahsan phawt teh ang u, nakin a report kimchang chu keimah ngei hian ka pe dawn nia” a ti a.  Zuala chuan “Kan Pathlawia hi alawm, a insual thiam show a chak tlat pek alawm” tiin min rawn nuih vur vur a, kei chuan “ I hmelchhe lutuk aaa” tiin ka lo chhang thuai a, kan nui ho dar dar a, tichuan kan chaw eikhawm na lam tur chu kan pan khawm ta a.

Nunmawia te in kan thlen chuan a nu Nu Diki chuan “ Nangni thianho chaw eikhawm tum pawh chu in va rei ve, rawngbawltu tur nula in rawn hruai ve dawn emaw tih nak laia a pa rual bawkin maw in in bawl chawp leh dawn a” alo ti hlut a. Nunmawia chuan “ Nu, kei chu i hriat vek kha i duat leh lutuk a, ka rawn hruai duh tawh rih lo a pangchang dawn nghal tlat engahmah hmain” a ti a  Nu Diki chuan keini ho lam chu min rawn melh pahin “ Awi, Awi a ti ve mai mai anih kha, tumah ala rawn hruai lo ania” a ti a a nui uarh uarh a. Zuala bawk chuan zawi sup hian “ ka rin dan vel a ni” alo ti a, kan nui ho dar dar a. Tichuan fiamthu te thawh pahin rawng kan bawl a, hlim takin chaw chu kan ei ta a. Chaw te kan eikham hnu chuan eng emaw chen chu kan han awm khaw muanga, kan ti ti kan nui ho dar dar a, a chang leh kan zai ho bawk a, tichuan dar 10 pm velah ah chuan kan in mangtha ta hlawm a.

Kan thianho hi naupang tet atanga inkawm chu kan ni hauh lo a, pawl sawmpahnih kan nih vel lai atanga inkawm khawm kan ni a, thenkhat in pa te kan chan tawh a, thenkhat in nu te kan chan tawh bawk a. Kan rilru hi a inhmu hlawm em em a, college kan zawh vek tawh hnu ah pawh kan la inkawm khawm ta char char a. College kan zawh hlim hian kei hian nupui ka nei tawh a, mahse eng emaw avangin kan inthen leh a, midang zawng hi chuan nupui an la nei hlawm lo.Mi thenkhat hmun danah chuan nupui neih hun chu anni fur tawh a, a then te phei chu chhungte ngei ngei pawhin an nawr tawh te pawh anni hlawm bawk. Ka thiante hi ka fak ve na hlawm em em chu ngaihzawng te chu an nei ve teh meuh mai, mahse tumah hian hna nghet tak kan la nei hlawm bik lova, Department thenkhat ah MR a chhawr lai te kan ni a, thenkhat chu mahnia sumdawnna bei chho ve mek te anni bawk a, duh ang taka an la in siam rem loh avang chauha nupui la nei ngamlo mai chauh te anni bawk. Duh ngat sela chuan chhungte chawm pui tura nei thei chu anni the meuh mai, chhungkua ah pawh khawsak harsa lo tak tak, mi neinung fa tak tak te anni, mahse chunti chung chuan mahni ngeia nupui chawm an duh avang chauh a, la nei lo te anni a. An rilru a puitling ka ti em em a, ka chhuang ru em em thin. Engemaw changa lirthei an rawn ken chhuah ve pawhin ka ta an ti ngailo a, ka nu motor emaw ka pa motor emaw an ti hram thin, an mahni sum ngeia an lei nilo nu leh pa te motor chu ka ta an ti ngam ngailo. Lehkhathiam tak tak te anni a, fair lo taka an hna dil ve atang pawh chuan tih tlak anni fo a, mahse phun nawi mai loin an bei ngawrh sauh emaw tih tur anni hlawm a. An zinga ka awm hi a chang chuan ka insit ru em em thin a, mahse an fel em avangin vawiin thleng hian unau ang maiin kan la inkawm khawm thei a ni.

Hun a liam a, kum te pawh a ral ve zel a. Tum khat chu Hospital road ah damdawi ka lei a, dawr neitu nen kan inbiak mawlh mawlh lai chuan ka hnung lamah hian mipakhat hian min rawn beng thuk a, “ I dam maw” a rawn ti a. Kei chuan leh hawia a hmel en pah chuan “dam alawm, ihh..tunge khah, ka van hre teuh che em” ka ti a. Chupa chuan nui sang chung hian “ savun, i ei duh em?” a rawn ti ta mai a. “ Ekhai aw, ka van han hai nasa che em em veee, i thau tawh si a, i hmel a fai vung mai si nen, ka hai chiang lutuk che lawm, khawimaw in chibai teh ang” ka ti hlut a, kan han in chibai tha leh rih a, kan nui dun bawk bawk a. “ Kal rawh thingpui in dun teh ang, treat che hi ka ba ve hrim hrim” a ti a, tichuan a piah lawk Millenium Centre lamah chuan kan in zui phei dun ta a.

Restaurant ah kan thut dun hnu chuan “ Hei hmel te hi chu kan in hre em em tawh a, Zodin bula kan buaina ah te pawh keimahni vangin in buai ta hrep kha a ni a, i hming hi ka la hre hauh lo a, kei hi Lalawmpuia ka nia AWP ti hian min ko thin a, tunge nang engtin nge ka koh ve ang che le” a ti a. “ Ani maw, kei hi Zoremsanga ka ni a, sanga tiin min ko mai thin a, Ramhlun ah sawn kan khawsa ve a” tiin ka hrilh a. Nupui ka nei leh neih loh thu te min zawt a, neih loh thuin ka chhang a, ka neih zawk awh thu te ka hrilh a, kan nui dun nasa hle mai. Ani erawh chu nupui neiin fa pakhat an neih thu te, mission veng ah an khawsak thu te min hrilh a, kan thiante ho hming kha kan in hrilh tawn a, an chanchin te kan sawi bawk a. Kan inkawmngaih nghal em em a, a nun hlui atanga nun thar a neih dan te chu ropui ka ti khawp mai. Khami ni Zodin a kan buai ve tak chiam tum te kha min hrilh nawn leh a, amah awpa te unau hi phir an lo ni a, khami ni khan a nau hian khang ho zinga a pawr ber bialnu kha alo chhaih fiam a, khami te kha thinrimin an lo zawng alo ni a, awpa kha an hmuh veleh khawih an tum nghal a, mahse a thiante khan lo thelh in Treasury Square bul atangin an rawn kalsan a. Tichuan khami te thianho khan rawn zui zelin Zodin ah khan an rawn khawih ta nghal bawrh bawrh mai kha alo ni a. Mahse khami tum khan an tang reilo a, thil awmzia chiang taka an hriat hnu chuan a tuk lawk khan engmah buaina awm lova in ngaidam tawnin Jail atang khan an chhuak leh nghal a ni awm e.

Jail atanga an chhuah hnu khan Awpa hi chuan ruihhlo tih kha nuam tihna a nei tawh lova, eng emawni tak hian a mawlh tlat thu leh amah ah hian khawhar ruk veng veng na a neih nasat em avangin an venga gospel camping an siam tumin a lut ve rawih a, a nun lo tuihal sa tawh nen chumi tum chuan a piangthar ta a, camp an chhuah hnu atang hian ruihhlo hi vawikhat mah a khawih leh ta lo a, meizial leh kuhva chenin a sim hmiah mai a ni. An thiante zinga pakhat zawk Lawma erawh vanduai thlak taka a boral thu a sawi a, chutih mek laiin an thianpa tho (Lammuala fiamthu thiam deuh kha) kha Muanzuala anih thu min hrilh a, ani pawh kha tunah chuan piangthar ve tawhin speaker hnung a zui a, a buai ve thin zia te min hrilh a. Kei chuan engmah ni bik lo mahila ka lawmpui zia thu chu ka hrilh bawrh bawrh a, kan ti ti tui bawk aniang darkar khat chuang mah chu chu restaurant ah chuan kan lo thu tawh a, ei man chu keimah zawkin pek ka tum a, mahse a phal tlat loh avangin amah chuan a pe ta nge nge a. Phone number te kan in pe a, remchang hmasa ber ah an In ah chuan chaw ei turin min rawn sawm a tum thu min hrilh a.

Tichuan Restaurant chu chhuah san in remchang hmasa ber ah inkawm leh tur chuan kan in thlah liam ta a. Ka hawng kawng tluan chuan Awpa thu sawi leh a chanchin te, a nun inthlak ta te chu ka ngaihtuah neuh neuh a, ka lawmpui em em a, mihring heti em em a nun han thlak hlawk mai chuh Pathian khawngaihna leh zahngaihna te, a hmangaihna nasat zia te chu ka ngaihtuah neuh neuh a. Pathian ropui zia chu fiah leh zual hian ka hria a, chutia ka ngaihtuah neuh neuh chhung chuan kan In chu ka lo thleng der tawh alo ni a.

Vawikhat chu inrinni tlai ah hian ka phone chu a rawn ri ral ral a, kan en chuan Awpa alo ni a, aw zang vah mai hian awpa chuan “ Sanga, tunlai i dam maw, kan va in be khat ve tiraw” a rawn ti nghal bawrh bawrh a, kei chuan “  nia mawle, i reh vang vang em alawm mawle, i dam maw kha” ka ti a, “dam alawm, nie tunlai chu eng eng emaw ka buaipui e ka tia, ka buai ve khawp a, naktuk tlai lam hi chaw rawn ei ta che, ka fanu kum khat tlin lawmna ni pah fawmin, bakah kan in leh lo te pawh min rawn hmuh pui ve na hun remchang ani bawk a”  a ti a “ava lawmawm awm ve aw, mahse ka ti buai lutuk ang che u a” ka ti a “ ti buai lo e a, e taka ka thianpa muanzuala pawh kha tunlai chu camping an neih loh lai ania, a awm remchan lai te anih avangin ani pawh a rawn tel ang, chuan i thiante kha a hman hman rawn sawm ve bawk ta che” a rawn ti a. Kei chuan “ Awle, chuti chu rawn kal ngei ka tum ange, ka thiante pawh ka lo be kual ve chhin ange, chuan programme kha dar engzat ah nge tan in tih” ka ti a, “ Dar 3:30 ah tan ila kan tia, lawmthusawi inkhawmna tawite hmang ve ila kan tia, kan in kha ila hrelo tak ang maw, mission veng Biak In i rawn thlen hunah min rawn call anga, ka rawn hruai mai dawn che nia” a ti a, tichuan kei chuan kal ngei ka tum thu hrilh in kan inbiakna chu kan ti tawp ta rih a.

Kan inbiak zawh chuan sana ka en a, dar 4 alo ri tep tawh a, ka nau mami rawngbawl lai chu min chhuahpui lawk teh tiin ka sawm a, “ Enge kan tih dawn, khawi ah?” a ti a. Kei chuan “present tur min lei pui lawk teh” ka ti a. “ Einchh..bialnu i nei ani maw” a ti a. “ Lo kal mai rawh, insiam pawh a ngailo” ka ti a, chhuah pah chuan ka nu bulah chuan “ Mami hi thil min lei pui lawk turin ka hruai lawk dawn nia”  “ khawiah maw, a tlai a tlai a” a ti a, “ a pawimawh lutuk” ka ti a  mami chuan “ nu, a bialnu present tur  ka leipui dawn” a ti a, a nui uarh uarh a ka nu chu nuih insum tih hriat tak hian a hmui a ti sawi put put a, tichuan kan chhuak ta a.

Kalkawng ah chuan Mami chuan “ ka u, eng maw kan lei ber dawn”, a ti a, kei chuan “ Mami, naktuk hi kan thianpa, e taka hmana Jail kan luh kha i hria em, khata kan mi puih te zing ami kha ania, tunah chuan a fel tawh em em a, fanu a nei a naktuk hi a kumkhat tlin na ania, min rawn sawm ve vang vang a, ka ngaipawimawh em a, present pek ve ngei ka duh sia, ka lei thiam dawn silo a, chuvang chu mawle ka hruai che” ka ti a Mami chuan “ Ani maw, avan lawmpuiawm tak ve a, tha deuh kan lei sak dawn nia” a ti a. Tichuan bazaar ah chuan present tur chu eng eng emaw kan lei sak a, hmeichhia tih takah mami chuan lei tur chu a awm ang tur chu a hre hle reng a, nalh taka kan fun tir hnu ah chuan kan haw ta a. Zan lamah chuan ka thiante ho chu ka be kual zung zung a, mahse tih tur an lo neih fur hlawm a, a then chu an chhungte damlo kan ngai te, a then chu tlai lam fellowship hruaitu tur te an nih hlawm avang chuan tumah chu an hman hlawm lo a, an lawmpui zia erawh uar taka lo hrilh chhawng turin min chah vek hlawm a.

Chawlhni tlai dar 2:30 ah chuan Awpa te in lam pan chuan ka chhuak a, mission veng Biak In bulah chuan ding in awpa chu ka phone a, rei lote ka nghah hnu chuan awpa chu a rawn thleng a,  ka kal thei chu a lawmzia min lo hrilh hlut a, tichuan an in lam pan chuan kan kal ta nghal a. An In kan thlen chuan ka rin aiin an lo hausa em em a, an in chu a lianin a changkang hle mai, an inhnuai ah chuan motor chu tlan lut turin min hrilh a, an motor dahna  (Parking ) pawh a zau nuam hle a, motor chi 3 vel chu alo i hung thap a. Motor ka park fel hnu chuan in chhung lam chu kan pan a, an In chhung chu a zau nuamin a thianghlim em em mai a, a design te chu a changkang hle mai. In chhung ah chuan awpa nu leh pa leh an chhungte thenkhat chu an lo thu thap a, awpa chuan min hmelhriattir pahin kan in chibai kual zung zung a, a sir berah muanzuala pawh chu alo thu a, ani pawh awpa ang tho a ruihtheih thil a sim hmiah avang chuan a fai puak a, a thau tawh bawk a nen, alo danglam tawh hle a. Kan han inchibai a, kan han nui ho leh ham ham a, thuthna te ka rem fel hnu chuan awpa chuan “ khawnge bawihi te hi an awm le” tiin a zawt a, a nu chuan “ In room lamah a thiante ho leh i nau te nen an chho anih kha, bawihtei thawmhnaw thlak pahin” alo ti a. “ka han ko ange” tih pahin awpa chu a chho a, room a a chhoh hlan chuan a in vel chu ka melh kuala, awpa tun hma nun kha ka chhui lut thuai a, hetiang anga chhungkaw hausa anih hi ka ring pha lo re re a, tunhmaa ka hmuh thin dan a inchei dan leh a khawsa zia ah kha chuan chhungkaw mumal pawh neilo tur ah ka lo ngai mai a, ruihhlo in mihring alo tih hoh theih zia te, alo tih zahawm loh zia te, alo tih at zia te chu hmu chhuak uarh uarh in ka in hria a.

Chutia ka ngaihtuah neuh neuh lai chuan, awpa chu naute pawmin a rawn chhuk a, a hnung ah chuan hmeichhe 4 hian a rawn zui a, Ekhai aw!!!!! Hmeichhe rawn chhuk zing ami khi, ka thinphu chu a rang dut dut a, min rawn hmuh ve hauh hmain tunge anih ka hrechiang ropui mai si a. An rawn chhuk zel a, step an rawn pel a, kan lam an rawn hawi lai chuan chu nu pawh chuan min rawn hmu chu a phawk chiang hle mai, a ding chat a.

Awpa chuan min hmelhriat tir pah chuan kan inchibai kual zel a, hei hi kan nu a nia tia min chibai tir lai chuan chiang takin ka en a, nupui pawh a nei hmeltha hle mai, mahse chianguangin ka en hman lo a, kan in nuih suk chauh ani. Ka rilru in thil dang reng a ngaihtuah tawh lo, a hnung chiah ah chuan an nu thiante ho chu ka chibai kual zel a, a hnung ber ah chuan kum 6 liam taa ka nupui thin ngei mai, kan inneih laia a ruka ngaihzawng min neih san avanaga loh theih lohna avanga ka then, a chanchin pawh hriat zui ka duh tawh loh leh hmuh pawh ka hmuh duh tawh ngai loh ngei mai chu loh theih lohin ka hmu a, ka hmaa hian a ding chu a ni si. Ka mumang ni te hian ka hre zawk rum rum a, Chutah le, loh theih loh chuan kan inchibai chu a ngai ta si a, kan invuan rei lo hle mai, a hmelthatna ala chuai lo a, a vun nalhna leh a pian phung ah danglamna ala awm hek lo, kan inneih lai ai zawng khan a hmeltha ta emaw tih mai tur hi ani zawk a,  min rawn melh zauh a, a hmelah chuan min zah nge min hua pawh hriat hleitheih loh hian nui hmel chu min hmuh hran lo a. Theih sela chuan min chibai duh loh ngei ang tih chu a awm dan atang chuan a hriat theih a ni. Awpa lah chuan a hrethiam der mai silova fiamthu in “ hei hi chu nuala ani tawh lo ania aw, pawmlai nei ani tawh ania, kan thiannu tho ania, Jennifer-i anih hi” a ti a. Ka rilru chuan kan chanchin hi hria ni la chuan mak ti awm mange aw ka ti a. Tichuan kan inchibai zawh chuan kan thut hmun lam chu kan pan a.

Chhung inkhawm chu Awpa pa chuan a hmang a, nen chuan in hma tawn zawnga thu kan nih avangin loh theih lohin kan inhmuh a ngai leh thin a ni. Ani pawh chuan min en tum lo deuh hian lang mahse a ruk tak chuan min rawn melh leh ralh thin tih chu ka hai hauh lo, chhung inkhawm chu zo vat vat tawh sela ka ti rilru hle mai a, awpa a pa in hunserh a hman zawh chuan Birthday cake zei na te an han neih leh te te a, cake an in barh lai te chuan hlim takin kut kan beng dar dar a, hun an ti tawp mai dawn emaw ka tih laiin Muanzuala chuan sawi ve duh a neih thu sawiin a ding chhuak a, vawiina kan kal khawm chhan te leh fanau enkawl chungchanga nu leh pa pawimawh na te a sawi chiam a, thu a thiam em avang chuan a ngaihnawm phian mai, a thu sawi ka nin vang ni loin sawi zo vat vat se chu ka ti rilru tawh khawp mai a, chutih lai mek chuan ka rin loh lutukin min din tir ta mai, ka phu loh chuan kei leh ka thiante chu min fak ta chiam mai a. An sual ve lai nuna kan thianho nen kan in tawn dan te, anni an ruih bawk bawk laia harh fim kara kan thianho hlim taka kan awm thin min hmuh khan min awh ruk ve thin zia te, an insual buai na karah kan lo tel ve avanga na lutuk awm lova an chhuah dan te, tin keini thianho ah khan zir tur an neih zia te chu a sawi ta chiam chiam mai a, thu a thiam bawk a, a thu sawi kar lakah chuan kan nui leh dar dar thin a. Min fak chiam mai chu lawm tho mahila ka zak ru chem. chem zawk a. Ka phuloa min fak avangin, Jenniferi pawh chuan a ngaithla ngun hle mai a, min rawn melh leh ralh thin a. Kei hmu chak viau mahila ka en tha duh tawh lo a, a hmel chu hmu chakin a ruk tak chuan la ngai mahila keimah ah hian na a awm tlat vang a ni. Tichuan Muanzuala chuan engemaw chen a sawi hnu chuan a duh tawk ve thei ta hram a, inkhawmna bik chu kan duh tawk ta a.

A tlai lam tawh nen chaw ei chu an siam nghal sang sang a, chutia an siam vel lai chuan Apwa chuan “ Ti rawh u, keini chu chaw ei an siam chhungin in chung vel i han fang ang u hmiang” tiin Muanzuala nen chuan min sawm a, tichuan in chung lamah chuan kan chho ta a. In an nei nuam bawka an in chung zawl pawh an ti nuam hle mai, khaw khawi a nuam em em a, a lang zau a, chung vel thlir paha thutna tur an siam thuthleng nuam tak te chu a mawi a, tin, an nu leh a nu in a sir vela an pangpar khawi mawi tak tak te chuan in chung chu a ti nuam leh zual hle mai. Chutia khaw hawi paha kan ti ti nak nak lai chuan kawngpuia Scorpio var nalh tak rawn chhuk chuan Awpa te in chu a rawn pan zel a, “ E khu khu, Jenniferi pasal anih khu, amah hi Police Inspector ania, a zahawm teh asin, chhungkaw hausa tak an ni a, mahsela Pathian tih mi tak ania, mi dik em em ani bawk a, ti mi hriatthiam na te a ngah em em a, chu chu a zahzawm leh zualna a ni, kan nu sawi dan in Jenniferi hian an inneih hma hian pasal a nei ve zawk tawh ani awm e, mahse eng emaw vangin an inthen a, chutih lai chuan tuna a pasal ni ta Johna nen hian an in tawng a, eng emaw chen an in ngaihzawn hnu ah an innei zui ta ani awm e, an in hmangaih nupa phian a, kan nu pawh hian a lawmpui zia a sawi fo asin” a ti a. Awpan chung thu a sawi zawh chuan "anih chu mawle, an inhmeh ngawt ang, in nu  nen hian naupan lai atanga inkawm an niang maw,” ka ti a, a chhan chu Awpa nupui hi kan inneih lai khan ka hre ngai lo a, bakah a hming a sawi pawh ka hriat ngai loh vang a ni. Awpa chuan “ Naupan laia atanga inkawm chu ni lo e, Jenniferi nuthlawi tawh hnu ah hian kan nu nen hian Oriflame company product hi an zuar dun thin a, an in kawmngaih phah ta em ani,” a ti a. “anih chu mawle” ka ti a.

Keimah hi ka mit deuh sulh a, ka thin phu hi a rang tual tual a, thinrimna nasa tak hian min rawn man a,  ka rilru chuan “ Awp, i hre sual hle mai a, he pa hi pa zahawm ani lul lo mai, mi nupa inkara rawn tla zep anih hi, hepa vang hian alawm kan inthena rilru na taka ka awm ni” ka ti a. Haw leh nghal mai chu ka duh rum rum a ni. Mahse puitling lo min ti lutuk ang tih ka hlau si a, ka theih tawk chuan ka in sum hram hram a, hlim hmel ka pu lui ta zawk a, Pathian chu ka rilru chuan ka au mawlh mawlh a "Lalpa, min tanpui ang che aw, mualpho in min awm tir suh la, nangmah nei tu ka nih na hi ka lan chhuah tir theih nan ka hmui leh ka min ven sak la, ka khawsak danah min veng ang che” ka ti mawlh mawlh a. Chutia ka ngaihtuah ding taka ka hawi vang vang lai chuan Muanzuala chuan “ Hawh u, chhuk ang u hmiang, kan bo rei lutuk chuan a dik lo ange, chaw ei te pawh an siam zo tawh ang, bakah kei hi zan lam inkhawm te ka duh a, ka hmahmawh ru angreng viau ania,” a ti a, tichuan kan chhuk thla ta a. Step a kan chhuk lai te chuan Muanzuala leh Awpa chu an ti ti thla mawlh mawlh a, kei chu eng dang mah ka ngaihtuah thei tawh lo, ka rilru a so but but hi a ni ber mai, theih tawpin in ngaihtuah harh ka tum a, ka rilru in ka tawngtai thla mawlh mawlh bawk a.

Siiting room kan thlen chuan Jenniferi pasal Johna chu alo thu a, Awpa nu leh pa leh amah Jenniferi nen chuan an lo ti ti mawlh mawlh a, Awpa chuan “ Ilo thleng thei maw, i va ti lawmawm ve aw, in nu hian in committee thu te min lo hrilh a, i buai awm teh lul nen,” a ti bawrh bawrh a, Johna chuan “ Buai lo e, hei kan nu hian a ngaipawimawh si che u a, bakah kei ngei pawn ka lawmpui em em che u a, rawn kal loh mawlh kha asin ka hlauh ni,” tih pah chuan a nui huah huah a, kei chuan a hmel ka hmuh ringawt pawh chuan ka rilru chu a na zawk zawk a, ka mihring rilru alo chhuak ut ut a, midang hmuh lai ngei mai chuan hnek siah a, thil awmzia zawng zawng chu sawi phiarh phiarh mai ka chak et et a, mahse ka insum hram hram a, Awpa chuan “Hei hi ka thianpa Sangtea anih hi, ani hi Ramhlun ah an awm a, hei ani pawh buai tak chungin min rawn hman pui hram hram a, ka lawm tak tak a ni” a ti a, Johna chuan “ Ani maw, khawi maw ilo in chibai ang hmiang, kei hi Johna ka nia,”  a ti a, in ti nelawm tak chuan min nuih var var a, kei pawh chuan loh theih loh chuan nui suk pahin ka lo chibai a. Ka rilru chuan “ Johna khang lai khan tun ang hian Inspector ila ni lo ang, tlangval mai ila nih kha, ilo in ti puitling hle ta mai a, ka nupui (tuna i nupui ni ta) thiam loh nge, ka thiam loh vang zawk, uire na sualah in lut dun a, pasal a nei ani tih i hriat kha keimah hi ka ni asin, hmeichhe ngainat tur in ilo inti nelawm thiam em anih hi mawle, khang lai khan facebook tih vel hi lo awm ve tawh nisela chuan hmel kan in hre tur ani a, message hmang maia in in biak avang leh kan nu khan i hming kha tuna i hming ang hian a save loh avangin ka hre lo che a, mahse in message bawlhhlawh pui pui kha ka va man nasa em, khami zana ka thinrim zia te kha hria ni la tunah hian min hmu ngam awm silo a aw, kha zan la la khan kan inthen a, kei  rilru na em em a ka awm lai khan ilo lawm awm hle mai, inthen zui loin tunah in innei ta chu ani sia maw,” ka ti rilru nauh nauh a. Ka thinrim a zual a, ka insum zo lo tak ngial dawna ka hriat avangin bathroom ah chuan ka lut ta vat a, ka hmai ka phih sawk sawk a, darthlangah chuan in en pahin keimah chu ka in fuih a,  “Pathian ka au mawlh mawlh a, chutih lai mek chuan ka rilru ah zawi te hian kan naupan laia ka nu bible chang min hrilh thin “ Thil thalo ti tute avangin in ti lungngai duh suh la, fello taka ti te chu awt hek suh” tih chu a rawn ri a, hriat loh luih ka tum a, mahse a chiang ting mai si a, “ Umm, Lalpa i thu rawn thleng hi harsa mahse zawm hram hram ka tum ange” tiin Pathian chu ka be mawlh mawlh a. Rei ngial ka awm hnu chuan ka chhuak ve ta a.

Ka va chhuah chuan chaw ei pawh an lo peih vek tawh a, Awpa chuan “ Sangte, lo kal rawh hei dawhkan lamah hian rawn kil rawh,” a ti a, mahse Jenniferi te nupa a nu leh pa te an thut avang chuan ka tui thlawt lo a, sitting room lamah ka thu zawk ange ka ti lui tlat a, chaw leh chawhmeh vel  ka suah lai chuan Awpa nupui min en dan chu a dik lo tlat hian ka hria a, inchung kan chhoh hlan khan Jenniferi hian eng eng emaw alo hrilh hma ngei niin ka ring ta a. Mahse ka hrelo der lui tlat a, chaw leh chawhmeh chu ka suak mawlh mawlh a, Awpa thiannu chuan “Sangte, ei teuh rawh aw,” a ti a,  "teh reng mai, ka ei teuh ang” ka ti a. Tichuan chaw  nen chuan sitting room lamah chuan ka phei ta a, Muanzuala chuan “ Sangte, lo kal rawh ka bulah hian” a ti a. Kan chaw ei chhung zawng chuan Muanzuala chu a ti ti mawlh mawlh a, mahse ka benga rawngah a lut hran lo a ni, ka aw e liam vel ta mai mai a, chaw pawh chu tam ka ei thei lo, haw vat vat ka chak a.

Tichuan chaw te kan ei kham fel hnu ah chuan reilote ka thu a, Awpa hnen ah chuan zan lam inkhawm ka duh avangin ka hmanhmawh thu leh haw mai ka duh thu ka hrilh a, tichuan ani pawh chuan min hrethiam em em a, Muanzuala pawh chuan inkhawm a duh ve avangin min rawn zui ve nghal a, an nupa chuan garrage thleng min rawn thlah a, ka kal avanga an lawm zia te min hrilh hlut a, remchang hmasa bera in hmu leh turin kan in mangtha ta a.

Haw kawngah chuan Pathian chu ka chhuah chhal mawlh mawlh a, “Lalpa, ngah nge hetianga rilru na tura min kal tir, harsatna te rawn siam ta che, ngah nge hrehawm taka ka awm leh, ka duh tawh lo asin”  ka ti a, a chang leh keimah zawk te chu ka inthiam lo leh a, Pathian chu be mawlh mawlh maia, chutih mek lai chuan kan In chu ka lo thleng der tawh a. Inkhawm turin ka insiam nghal mawlh mawlh a, tichuan Biak In lam chu ka pan ta.

Inkhawm kan ban hnu chuan room ah chuan ka lut vat a, vawiin lama ka thil tawn chanchin te chu ka ngaihtuah let a, a chang leh ka thin a rim a, a chang leh mi nupa hlim taka awm tawh chu Pathian mi ka ni tawh si chuan lawmpui mai awm ka in ti a. Chutia ka ngaihtuah vak vak lai chuan ka rilru ah tlaia Pathian min rawn pawlna Sam 37 na thu kha alo lut leh a, kha thuin min rawn pawlna kha lo ngaihpawimawh lo lui ila, mualpho taka ka awm bakah, Pathian hi ka lo ti mualpho dawn alo ni tih te ka ngaihtuah, ka ngaihtuah thui zela Pathian min hruai dan leh amah hnenah pawh engkim mai ngam taka ka dil ngam na te, ka vui ngam bawrh bawrh dan te hi Pathian nen hian ka in zawmna alo thuk tawh zia ka ngaihtuah kai ta zel a, engkim ah hian fiahna hi min lo paltlang tir thin alo ni tih ka ngaihtuah chhuak ta a.Vawiina thil thleng pawh kha fiahna leh midangte hmaah Krista ka neihna hi lo lan chhuah tir zel a ngaih zia min hriat chhuatir uaih uaih a. Tichuan thingthia tawngtaiin “ Lalpa, i mi kaihhruai dan hi AVA MAK EM,        ka lo hrethiam thin lo a ni, tuna tang chuan i thu ang zelin ka chung ah thleng rawh se” tiin ka inhlan nawn leh ta a.

MELENIE

Remsanga (Rsa) chu Eric-a te In atanga a haw chu an In a thlen chuan dar
12:15 A.M alo ni vah tawh a. Khua a lum lai lo ni nen, mut nghal mai chu harsa a ti a, inbual tur chuan bual in (bathroom) lam chu a pan a, tui vawt raih mai chuan a in leih phar phar a, a dai sawng sawng mai. A inbual zawh hnu chuan a room lamah chuan pheiin, a towel zar that pah chuan a phone a charge mek chu a bih zauh a, facebook ah chuan inbox check tur a nei tih chu a zu hmu mai a. chhiar nghal ta lem lo chuan a bul lawka tukverh chu hawngin chair a pawt phei a, mezial te an tan leh te te phawt a. Bawp khawkhera thuin van thiang kuk mai leh arsi pe uarh mai te chu a thlir vang vang a, Pathian thil siam thiam dan hi aw tiin a ngaihtuah ve neuh neuh a.
Chutia a ngaihtuah lai chuan a phone chu message a dawng tih hriat tak hian a rawn ri leh keuh a. A charge lai chu phawiin a message dawn chu a chhiar ta a, " Hello, biak che ka van duh" tih hi alo awm a. A rawn thawn tu chu tunge ni re re tiin a facebook profile chu a han en chiang chhin a, Melenie tiin a hming a dah a, nula ngo lam hmelchhelo tak mai hi a ni a, a facebook profile picture leh midangin thlalak an tag na te chu a en zel a, hmeichhe hmelchhia chu anilo tih chu a hmu thiam mai a. Tichuan timline te chu a han check zel a, nula luck ve pangngai tak ani tih chu a hmu leh mai a, ti hian a chhang let ve ta a, " Hello, enge ni ta? " tiin.

Tichuan phone chu a rawn ri leh tlang a,  " I phone number min lo pe" tih hi a rawn thawn leh a. Rsa chuan hmeltha ti ru viau mahse mak a ti deuh a, " enga tan nge aw" tiin a chhang leh a, a rilru te te chuan tun ang hun thleng a  la meng, mipa phone  number dil nghal tawp ngam chu tiin ngaihdan a nei deuh a, chutih lai chuan a phone chu a rawn vibrate leh dat a. " Ka star lutuk che a, zah theih loh chhuahin i no ka rawn dil tawp che anih hi, min lo pe teh mawh plizz in" tiin a rawn chhang leh a. " Ngawi teh, thiannu, kan vawikhat inbiakna chauh ala ni si a, phone number in pek nghal ngawt chu a chi loh deuh ka ti, khawngaihin min hrethiam rawh" tiin a chhang let a. " Awle2, mangtha phawt le" tiin a rawn chhang leh a, Rsa pawh chuan tha takin " Mangtha le" tiin a thawn let ve mai a.
Tichuan a tukverh kawngkhar chu kalhin, khum lam chu a pan a, a tawngtai zawh chuan hahdam takin a mu zangthal a, a rilru chuan tunlai hmeichhia han zah loh zia hi chu aw, tih te a ngaihtuah neuh neuh a, kha hmeichhia pawh khan mipa engzat tak kawp tawh ang maw, ka zoram hi a va tawp ta em tih te a ngaihtuah zel a, tichuan engemaw chen hnu ah chuan mutchhuakin a rawn zem chiai chiai a, a muhil ve ta a.

Zing a tho chu sana a en a, dar 7:00 alo ni tawh a, khum atang chuan a tho chhuak nghal a, a khum bula a dah tui chu a han in nghal khawlh khawlh a. Choka lamah chuan muang changin a phei a, a nu leh pa chuan chanchinbu chhiar pahin an lo ti ti malh malh a, a nu chuan Rsa a  hmuh veleh “ Mapui, tukin zing chu exer i la na nge, thingpui kha  i duh leh lo inthlit ve nghal mai rawh” alo ti nghal bawrh bawrh a. “ Aw, nizan ka meng rei deuh a, thawh ka lo hai pek alawm le” tiin thingpui chu a thli ve nghal a, an bula thut pah chuan chanchinbu chu a bih ve thuak thuak a, eng eng emaw sawiin an ti ti luam a.

Thingpui te an in zawh chuan inthiar turin toilet lam chu a pan a, a phone chu inthiar pah chuan a khawih neuh neuh a, message alo awm leh ran tawh a, an han en chuan nizana nula bawk kha alo ni leh a, “ Tuk chhuah nuam le” tih hi alo dah va a. A hmel leh a mizia awm a ngaihtuah a, Good morning tih hmang lova mizo tak maia a rawn chibai chu chu nula chu a lawm ru reuh phian a,  “ Nang pawh tuk chhuah nuam le” tiin a chhang let ve a. A inthiar zawh hnu chuan a room ah chuan a phei a, a wardrope chu hawngin a thawmhnaw neih ang ang te chu a en fel a, chhun lama a hak tur te chu a en fel a. Tlangval in uluk tih takah a fai tha in a mam nalh hlawm hle mai.
Chaw te an ei fel hnu chuan Rsa chu office turin a insiam malh malh a, a insiam zawh hnu chuan office tur chuan a bike chuan a in khalh chhuak ta a. Office a thlen chuan an peon leh an officer pakhat chiah an lo la thleng a, an peon pu Rama chuan “ Rs, thingpui hang i duh em, ka rawn thlit ang che aw” alo ti nghal zung zung a, Rsa chuan “ Pu Ram, ka lo inthlit ve mai ang, a harsa chuang hleinem” a ti a, Pu Rama chuan “ Ngawiteh Rs, heng te chu kan tih tur alawm, kum lamah chuan kan fate rual mah ni ula, hna ah chuan kan hotute zawk in ni a, chuvang chuan inthlahrung re re suh” a ti a, Rsa chuan an hnial viau dawn a, Pu Rama chuan thingpui chu ava thlit zung zung avang chuan lawm takin a thingpui pek chu alo la a.

Pu rama chu Rsa thingpui a pek pah chuan Rsa bulah chuan thun hmun a rem tha sauh sauh a, “hei Rs, kum 5  lai mai kan thawk ho ta a, hmai chhan mah nise ka fak duh che a ni, i rawn thawh tirh atang hian i tlai lai ka la hre miah lo a, tin aia upa leh mahni aia senior zawk te i zah thiam em em a, hna hniam zawk te leh hna sang thawk zawk te pawh i mizia hian a thliar ngai lo re re tih hi ka hmu thin a, i zahawm ngawt mai. Mi tam tak chu mahni aia thawk hniam anih tawh phawt chuan, aia upa mah nise an zah lo thin em em a, a kristian zia lovin a mizo zia lo ngawt mai ka ti thin. Nangni ang vek hi kan ram Sawrkar hian hna thawk nei sela chuan Office dawr hi a nuam anga, eiru pawh hi an vang khawp ang” a ti a. Rsa chuan inthlahrung tih hriat tak hian “ E khai, Pu Ram, chutiang chu ka nih bik loh kha, hei kum lamah nise ka la nau em em a, Sorkar hna kal phung ah pawh tawn hriat ka la nei tlem a, kan hotute leh midang mit khamna pawh hi ka hnuchhiah fo zawkin ka ring thin. Mahse an fel em zawk a, ti han mualpho loin kan la khawsa hram hram a, bakah nangni thleng pawn fa ang maiin i mi en thiamna azarah thlamuang tak leh nuam ti takin hna kan thawh ve theih phah chauh zawk alawm” a ti a.

Chutia an ti ti dun mawlh mawlh lai chuan midang pawh chu an rawn thleng ve mek a, attendance register ah chuan hming an han sign sap sap a, Rsa te thawhpui nula hmelchhe lo tak leh pian pawh nalh tak Mami chuan a thutnaa thu pah chuan “ Pu Ram, thingpui kha min han lak nghal teh aw” a han ti deuh thak a, Pu Rama chuan kal pah chuan Rsa chu mit san zeuh pah chuan a han nuih suk a, Rsa pawh chuan alo nuih let ve san san a.

Rsa chuan hna chu a thawk tan ta a, file chin fel ngai ang ang chu a khawih nghal mawlh mawlh a. Chutih lai chuan a phone chu a rawn ri leh tlang a,  a han en zawk a,  “Enge vawiin lam te i tih dawn” tih hi nula bawk khan a rawn thawn a. Rsa chuan henu mai mai chu aw tih pah chuan “ Hei Office ah ka kal a, nang zawk enge i tih dawn?” tiin a chhang let a. A rilru tak chuan hriat chian chu a chak deuh hlek a, facebook ah chuan lutin a profile leh timeline te chu a han en chiang leh ngat a, a thu ziah tam tak atang chuan Pathian a ngai thin hle tih chu a hmu thiam mai a. Mahse nizan lama a rawn biak dan nen a han ngaihtuah chuan mak a ti viau ang reng lawi a. Mi mak tak zawng anih hi mawle a ti rilru neuh neuh a. Chutia a ngaihtuah lai chuan “ Kei chu In ah ka awm mai mai ang, khawi Office ah nge i thawh a” tiin a rawn chhang leh a. Rsa chuan hna a ngah deuh hlek avang chuan a chhang zui ta lem lo a. A hna thawh tur ang ang te chu hmanhmawh tak leh fimkhur tak chung siin a thawk zung zung a, (a tawi zawngin) tichuan sana a en a tlai ban chu alo hun leh der tawh mai a, a hna te a en fel a, a tih bak te chu a tuk lam atana chhunzawm leh tur chuan a dah fel a, tichuan In lam pan chuan a haw ta a.

Chaw te an ei kham hnu chuan a room ah chuan a thu vang vang a, vawiin lam hna a thawh nasat deuh avang chuan zan lam chu chhuak loin awm hahdam nan hman tumin a rilru a siam fel a. Tichuan a computer chu on in hla a ngaithla vang vang a, chumi pah chuan a online a, nula message bawk chu alo awm leh vah tawh a

Nula :Zanin chhuak dawn em?”
Rsa: Chhuak lo ang, ka awm mai mai dawn
Nula: I chass i rim dawn lo ami?
Rsa: Rim dawn lo, chhass ka nei lo.
Nula: Ka awih lo e a, i nei chhelo ngawt ang.
Rsa: Hahaha.. Chutiang tur te chu han awm se nuam awm.
Nula: Nih leh min lo rim mai la
Rsa: Hahaha..Zan dangah aw
Nula: Zan dang chu ni tawh se aw..hihi, nih leh i phone no min lo pe
Rsa: Ka phone ka ti bo daih a, a dang ka neih leh hun ah aw.

Rsa chuan pek mai chu a chak ve khawp mai a, hmeichhe hmeltha tak maiin chutia a no a dil a dil mai chuh tuar har a ti ve ngang mai. Mahse tlangval insum thei leh fel tak a hriat chian loh chu mipa pawh nise phone number a pe mai mai ngailo mi a ni. Hemi zan pawh hian nula nen hian an in be rei khawp mai a, mahse nula tan hian han zuam leh ngam em em turin a be lo a, mahse nelawm tak tur si a chhang reng thung a, an veng hming te pawh an in hrilh dun nghe nghe a. Dar 11 velah chuan tui taka mu turin an in mangtha ta a. Rsa pawh chhun lama a chauh deuh avang chuan meng chhunzawm loin a mu zui ve ta a.

A tawi zawngin sawi mai ila, vawitam tak an in bia a, nula pawh chu a hming te pawh Rsa chuan a hre ve tawh viau a, Melenie Lalmuanpuii ani tih te thleng chuan a hre tawh a. An inbiakna a thianghlim a, ngaihzawng lam leh thil tenawm lam sawiin an inbe ngailo. Zan khat chu Melenie chuan Rsa chu message thui tak a rawn thawn a, “ Tunah chuan Kristian tlangval dik tak, mi rinawm tak tur thian ka nei ta che niin ka hria, Rs, kan inbiak tan tirh zan atang khan i mizia hi ka chhui ngat ngat a, achang leh hmeichhe lerh leh lepchiah ang takin ka rawn awm a, a chang leh hmeichhe fel em em angin ka rawn in lan bawk a, i hrethiam vek em chu ka hrelo a, mashe tu pawn rawn bia che sela, Pathian \ih mi dik tak i ni tih hi an hai lo ang. Ka ngaisang tak zet che. Ka han inpuang law law mai ange, kei hi ka hming chu ka hrilh tawh che a, kan veng pawh i hre tawh, mahse ka hna leh nihna ka rawn sawi zawng zawng kha chu dawt vek anih kha. Civil Hospital ah sawn Doctor ka ni a, kum 2 chu ka thawk ve tawh a, nuam pawh ka ti thin khawp mai. Mahse nikum lai hawl vel atang khan rilru natna deuh mai ka nei a, chumi avang chuan ka nun hi a hrehawm tak zet a, zanin thleng pawh hian ka nun hi a rum vawng vawng a ni. A chang chuan thih daih mai te hi ka chak a, intihhlum te pawh ka tum ut ut \hin, mahse a dawn ah hian kan ngam leh thin silo a ni. Kohhran ah ka inkiltawih ngawih ngawih a, ka \halaipui te zing ah nuam ka ti bawk silo a, Pathian hi ka au ve \hin a, mahse ka thinlung tak hian ka au  ngam chuang silo.

Thildang ah ka peng thui lutuk dawn, ka hrasatna chu kan hrilh ang che, phaia lehkha kan zir lai atang tawhin tuna ka rilru min tihnat sak tu nen hian kan in ngaizawng a, kan inhmangaih em em a, thianghlim takin hun kan hmang thin. Kan zir zawh hnu ah pawh kan in zui ta zel a, a ni hi Engineer ani a. Pathian \ih mi em em \hin leh tlangval fel tak a ni. (Aw khang hun lai te kha ka va ngai em) Inneih te pawh kan sawi dun uk uk tawh a, nikum hmasa lam kum tawp lam a\ang khan zu in ve zeuh zeuh hi a ching chho \an a, mahse a rui em em hi chuan a awm ngailo. Ka hau fo a, ani pawhin sim hmak a tum thu in min chhang ve thin a, ka lawm thin em em a. Mahse sim a hnekin a in nasa tulh tulh emaw tih mai tur hi a ni a, ka rilru a na thei khawp mai.

Tlaikhat chu an In ah chaw ei ah min sawm a,  chaw kan ei hma chuan a room ah kan ti ti dun a, kan college kal laia kan thlalak dun te chu kan en dun a, kan hlim hle mai. Hemi tlai pawh hian zu rim chu a nam a, mahse a rui pawn ka hre lo. Computer ah chuan kan hla duh dun thin em em chu a play riai riai a, kan in kuah a, kan in kiss a, mahse nidang a ang tlat lo. A kut chu a hlei em em a, ka hnute te chu min tham sak a, ka nem sawn dawrh a. Mahse a tawp duh chuang lo min fawp nasa telh telh a, ka kawr chu min phelh sak a, khum ah chuan min bawhthlu ta.Ka nem kang thuai a, “ Ngati nge hetia min tih, Inneih hma chuan hetia awm ka duh lo, ka ti a”  Mahse tawngkam a thiamin min thlem reng a, a nupui ka nih thuai tur thu te, leh min hmangaih zia min hrilh chhen a, kei pawhin ka hmangaih ve em avang leh ka tawngkam thiamna in ka hnar hneh loh avang chuan hreh tak chungin sex chu ka hmang ta nge nge a. Kan hman zawh chuan hrehawm ka ti em em a, ka inthiam lo a, ka tap zawih zawih a, mahse min hmangaih tak chung chuan min pawm hle hle, tawngkam thiam taka min thlemin ka lungawi ve mai a, mahse maw Rs, hemi tlai hian ka chaw ei a tui thlawt lo a, chaw pawh ka ei mang lo a ni. Zanah chuan min thlah phei a, hemi zan hian chhin khat pawh ka chhing lo, ka inhua a, ka in ten em em a, ka inchhir ngawih ngawih bawk a. Ngati nge ka lo then zawk mai loh tih te ka ngaihtuah a, mahse a sawt tawh silo.

A tawi zawngin kan sawi mai ange, hemi hnu atang hian kan inhmuh fal hlek chuan sex kan hmang dun ta zel a, keipawn ka thianghlimna ka hlan ta sa sa tiin ka hnar tawh ngailo. Hun te a liam zel a, nikum kum April vel khan ka ruak lo tih ka hre chhuak ta a. Hrehawm chu ka ti viaua, mahse ka hmangaih ber nupui ka nih hun a hnai tawh tih ka hriat vangin ka in hnem a, ka rilru hrehawm pawh engemaw chen chu min chhawk thin. Amah pawh ka hrilh vat a, a lawm ve khawp mai a. Inneih vat vat a chak tawh zia te pawh a rawn sawi a, naute hming tur te chu a rawn phuah fiam vel a, kan hlim thin khawp mai. Mahse Rs, zan khat a rawn leng chu kan ti ti a, a rui em em a. “Raipuar sa nupui ka duh lo, min nei duh anih chuan i tih tlak a ngai” ka meng kawk a, ka thin a rim em em a, ka rilru a na bawk si, “ I mawl a mi a, hei chen ka pai tawh a, tih tlak te i sawi a, bakah nau tih tlak ka duh lo, tual that kan ni dawn sin” tiin ka hau a, ka thin a rim em em a. Hemi zan hian kan in hau nasa em em a, ka tap bawk a, engmah ka thu sawi chu a ngaithla duh lo a, thinrim tak chung chuan min haw san ta a.

“ Chumi zan chu zankhua in ka muhil theilo a, ka rilru a na a hrehawm ka ti ngawih ngawih a, ka tap zankhua hi a ni ber mai. Nau han tih tlak ngawt chu ka ngaihtuah zawng pawh hian ka hlau a, ka khawngaih a, ka ngam lo a ni. Mahse zanin anga a rilru kha a pu anih tlat si chuan keimahin ka pawm a ngai anga, pa tello a naute a rawn piang chhuak tur chu ka ngai ngam bawk silo. Tichuan zing khawvar ah a harh fim hun ah ka be tha leh mai ang, chutah chuan a rilru te pawh alo harh fim tawh anga, zanin kha chu a ruih vang mai mai aniang tiin ka inhnem chawp a. Mahse ka rilru ah thlaphanna leh hlauhna chuan min rawn zem leh a, chhin khat pawh chhing loin ka tlaivar zak a ni.  Zingah chuan phone chu ka en a, han phone nghal mai ka tum a, mahse ala hma em avangin ala thoh ka ring lo a, tichuan a thawh hun nghakhlel tak chuang chuan ka tho chhuak a, hmai te phih faiin keimah ka in ti fai a. Ka mit bui deuh luk chu ka chhung ten an hmu ang tih ka hlau a, ka theih ang ang chuan makeup hmangin ka thup hram hram a. Dar 8 velah chuan ka va call ta a, aw fel leh harh vah hian min lo chhang a, nizan i mu tui em tiin tha takin min rawn bia a, kei chuan chhin khat pawh ka chhin loh thu leh ka rilru hah zia te ka hrilh a, zan lama a thu sawi chuan min thawn zia te, a ruih vanga sawi nge anih a ti tak tak tih chu ka zawt nghal a.

Ka rin loh lutukin min rawn chhang ta, zan lama a ruih vanga a sawi mai maia ka ngaih kha alo ti tak tak alo ni a, naute ka ti tla lo anih chuan inneih chu a duh loh thu in min rawn chhang a, ka ti tla anih erawh chuan a rang thei ang bera palai rawn tirh a tum thu min hrilh ta. Ka rilru ava na tak em, i va han sual em em ve, hetiang rilru i put ngai loh kha, ngati nge hetia i awm tak tiin ka tah khum a, chutah thiam takin min hnem a, naute chu a len tak tak hmaa ti tla mai tur leh a pawi kei ngei pawh ka hming chhiat min hlauh pui zia thuin min rawn thlem a, kei hmeichhe rilru no lo ni bawk nen. Min thlem lungawi leh ta mai a. Min hmangaih zia thu te pawh min hrilh a. A zu in a sim nghal hmiah tawh tur thu te nen lam min hrilh a. Zu in sim a tum chuan min ti lawm a, mahse nau tih tlak chuan min deng na em em a, mahse inhmangaih taka kan awm dun theihna tur anih dawn chuan ka nau pai thla hnih awrh chauh ala ni bawk si nen, hreh tak chuan ti tlak chu ka tum ve ta a.

Hreh tak chungin hemni hian ka ti tla ta nge nge a ni. Ka rilru a na em em a, Pathian pawh ka au ngam lo a ni. Ka tih tlak thu te ka va hrilh a, alo lawm em em a, zan ah pawh chuan a rawn leng nghal a, hemi zan hian zu rim a nam lo a, amah pawh tun hma ang khan a fel em em a. Min hnem siam siam a. Inneih vat vat a duh tawh thu te min hrilh a, keipawh chuan a duh hun hun a, palai rawn tir tur chuan ka ti a. Kan inneih hma chu vawikhat mah sex hmang tawh ngai lo turin a intiam nghe nghe a, ka nau tih tlak chuan ka rilru ti na em em mahse, a thu sawi chuan min ti lawm em em thung a.

A tawi zawngin sawi zel mai ila, hemi zan atang hi chuan vawikhat mah zu a in tawh ngai lo a, a hma ai khan min rawn be nasa a, min ngaihtuah em em a. Ka lawm a, ka hmangaih zual sawt bawk a. Chhun zanin kan in bia a, chanchin kan in hrilh tawn reng a, kan in hne theilo ani ber mai. Tichuan palai rawn tirh a tum thu leh ka chhungte pawh lo rawn turin min ti a, kan va han hlim dun tak em. Guwahati ah hna thil a training a nei lawk anga, chumi alo haw veleh chuan palai rawn tirh a tum thu min hrilh ta. Guwahati a a training lai pawh chuan kan in be reng a, a rawn haw dawn ni chuan kawr nalh tak min lei thu leh pek vat vat min chak tawh zia te chu min hrilh a, keipawh chuan ka nghakhlel em em a, tluang taka rawn chhuak turin kan in thlah ta a. An thlen chin te min rawn hrilh zel a,  zan dar 6 velah chuan Vairengte tluang taka an rawn thlen thu te, chaw an ei dawn thu te min rawn hrilh a, ka lo nghah char char tur thu leh chanchin min rawn hriattir zel turin ka ti a.

Keipawh chuan lo ngah pahin tiin ka duty loh zan te ani bawka hahdam deuhin hun hman ka tum a, Movie te ka lo en, dar 9 a rik pawh chuan chanchin engmah min rawn hrilh tak loh avang chuan ka zu phone ta a, a ring ral thak thak a, vawi 5 chuang ka phone pawh chuan a la thei ta reng reng lo mai le. Ka ngaih chu a tha lo deuh a, mahse a muhil rih aniang tiin kan nghak deuh a, mahse ka phone leh pawhin a ring ral ta zel si a. An accident anih ka ring a, ka thla a phang ru em em mai a. Chutia ka nghah vang vang lai chuan ka whatsapp group awmna pakhat ah chuan Kawnpui leh zanlawn inkar ah Bolero accident thu an rawn post a, mahse tute nge annih tih an la hriat loh thu leh tlawmngai in an accident na hmun an pan mek thu an rawn post ta.

Ka hlautawng em em a, ka thu hle hle thei tawh lo, ka room ah chuan ka vei sek a, ka phone chu hlau ru angreng tak chuan ka melh leh zauh zauh thin a, chanchin chiang hi an rawn post anga an mahni anni mai ang tih ka hlu si, ka hre chak bawk si chu ka mangang a ni. Chutia ka phone ka melh reng lai chuan phone call chu ka dawng ta. Ka thianpa no atang ngei mai chuan ani leh nghal a, hlauthawng kut khur dur dur chung chuan ka la ta a, pa pakhat hian “ hei ka pi, i pasal hi an accident a, vanduai thlak takin mihring an chang zo lo ta hlauh mai, tlawmngaiin kan la chhuak mek a, zanlawn ah kan la chho anga, chhungkua in lo in hrilh anga, in rawn chhuk mai dawn nia” a rawn ti ta anih chu. Ka bing mup mup a, ka phone ken lai chu ka thlauh thuai a, ka tap chhuak ta rawih rawih a, ka thawm hriaiin ka nu leh pa te ka room lamah an rawn tlan lut nghal a, chanchin min zawt a, harsa ti tak chung chuan ka hrilh ta a. A chhungte pawh ka pa chuan a phone nghal a, anni lam pawhin an lo hre tawh a, an kal nghal thu te an rawn sawi a, keipawh kal ngei ka duh avangin ka pa nen kan driver nen chuan kan tlan liam ve ta nghal a. Zanlawn kan zu thlen chuan an hall kawt ah chuan an lo awm deuh laih laih a, motor atang chuan rang taka chhukin hall ah chuan ka tlan lut nghal a, kuang chhung ah an lo dah tawh a, ka tap ta rawih rawih a. A taksa ah chuan hliam hnu hma hmuh vak tur a awm lo a, a pum lam a sawh chhia anih ka ring ta a. A tawi zawngin sawi zel mai ila, Aizawl lamah chuan in phur chho in a tuk ah chuan kan vui liam ta a.

Kan vui liam hnu chuan ka tan chuan khawvel hi a tawp ni ta ber hian ka hria a, ka hlim ve dawn chauh a heti hian lungngaihna in min rawn chim leh nghal a. Pasal sun ang hialah te ka in ngai ani. Kan vui liam atang a ni 3 na ah chuan, ka thianpa pa chu rawn kalin polythene ah hian thi uluk taka fun hi a rawn keng a, “ hei mama khan a rawn hawn che aniang, kan han en ngial thin a, a nu chauh hi hmeichhia kan nei si a, mahse a nu te ang hak chi ani silo a, i ta anih ngei kan ring a, tiin min pe ta a. Ka han en chuan kawr nalh tak mai hi alo ni a, ka tap chhuak ta a. A pa pawh chu a tap zawih zawih a, “ Mama, i thiannu hi han en the,  ti hrilhhai lutuk, nangmah ngeiin i pe dawn lo em ni” tiin a tap ta hawm hawm a. Ka nu pawh alo insum zo bik lo nen min rawn kuah a, kan tap ta hawm hawm a. Tichuan a kawr min rawn hawn pawh chu tun thleng hian ka la ha phallo a, ka wardrope ah nalh takin ka la khai tha a ni.

Ka nun hi a ruak em em a, ka mal ngawih ngawih ni te hian ka hre thin, kohhran ah ka in hmang em em peih silo a, thenrual pawh ka pawl lutuk lo a ni.  Ka duty loh ni hi chuan tih hian facebook leh whatsapp lamah hian mi Pathian thu post te hi ka lo chhiar a,  mi tam tak chu va kawm chian a, ka harsatna te hrilh ka tum thin a, mahse maw tlang takin sawi mai ila, min ngaihzawn an tum zel a. A chang leh message sexy deuh te min rawn thawn leh thin a. Pathian thu hi kawr ah an hmang nasat zia hi ka hmuh phah a ni. Ka rawn biak tan tirh ang chiah che khan ka va be thin a, mahse beidawnna bak ka tawng ngailo. Nang erawh chu Pathian tih mi tak i ni a, kan inkawm rei ve ta a, i nun ah hian ka hmu tlat a ni. Ekhai, ka chanchin ka rawn ziak ta vak mai a, ilo ning viau maithei mahse keimah hi ka thawl ta hawkin ka hria, min lo tawngtaipui ang che aw” tiin.

Rs’an message an chhiar zo chiah chu a biangah chuan mittui alo luang zawih zawih tih a in hria a, a in hru fai nghal mawlh mawlh a, phone chu la kangin “ I contact no min lo thawn teh a” tih hi a thawn nghal a. Hei hi Rsa hian hmeichhe phone no a dil vawikhatna a ni. Melenie pawh chuan a rawn thawn nghala , a vawikhatna atan rsa chuan a phone hmang chuan a be ta a. Aw vawikhat an in hriatna ani a, mahse chu nula aw chu rsa chuan ngaihnobei a ti em em a, a nelawm a ti khawp mai a. Melenie hnen ah chuan a message alo chhiar thu te, a khawngaih zia te, a nat dan tur a hriatthiam pui zia te chu a hrilh nghal zung zung a, ama lakah chuan engahmah inthlahrung lo tur leh a rilru hahna te leh a chanchin te a hrilh duh avanga a lawm zia te,  beidawng miah loh tur leh alo tawngtaipui mawlh mawlh tur thu chu a hrilh nghal bawk a. Hemi zan atang hian Rsa chuan Melenie tan liau liau tawngtaina hun a hmang ta ziah a, tlai tin chaw ngheiin a tan a tawngtai sak bawk thin. Mahse heng a thil tih zawng zawng hi tumah a hrilh lo a, amah Melenie ngei pawh a hrilh ngai lo bawk.

Kum khat chuang a an inkawm hnu chuan an innel em em tawh a, a len pawh an in len pawh ve reng a, Melenie pawh a hma zawng ai chuan a nun a hlim em em tawh a. Hmuh theih khawpin a taksa leh a hmel ah pawh a lang thei tawh a ni. Mahse inkhawm leh khawtlang lamah erawh ala lang tam lo em em thung a. Zan khat chu Rsa chuan Melenie hnen ah chuan “ Zanin chu chhuak dun ang hmiang” tiin chhuah pui ah a sawm hlawl mai a. Vawitam tak chhun lamah te chuan in hmu in zanah pawh Melenie te in ah chuan a leng fo a, mahse chhuah pui a tak hi chuan zan lamah leh nghal chuan ala sawm ngailo thung. Melenie pawh chuan chutia a thian tha berin a sawm ta chu zan chhuah chu hreh viau mahse alo remti ve mai a.

Zan dar 7 ah chuan Rsa chuan Melenie In lam chu a pan ta a. An chhuah dawn chuan Melenie chuan “ A vawt si, ka car in kal mai ang hmiang” a ti a. Rsa chuan “hmeichhe khalh ah ka chuang ve ngam dawn emawni le” tiin a fiam zauh a, Melenie chuan “ I sual e a” tih pah chuan a nuih seih a. Rsa chuan nui hak hak chung chuan “ awle, I car chuan kal ila ni mai lawm” a ti a, tichuan an chhuak dun ta a. An kal pah chuan Melenie chuan “ khawiah nge min hruai dawn, kan tlan tawp a, kal na tur lam ka hre  miah lo ania aw” a ti a. Rsa chuan “ Ani maw, ka lo hrilh lo che a ni, Durtlang lamah tlan chho rawh” a ti a, Melenie chuan “ Durtlang  ah a, damlo kan kan dawn mi” tiin Rsa chu a zawt a, rsa lah chuan engah vak ngaih hmel loh tak hian “ Aw Durtlang lamah, mahse damlo chu kan kan dawn lo, kan thleng anga i hre mai ang” a ti mai a. Melenie chuan “ Eng tak chu min tihpui dawn che ni maw” tiin a nui har har a. Tichuan an tlan chho zel a, Aizawl Theological College bulah chuan car chu an dah ta a. Ke in an kal phei ta a, Melenie chu a vawikhat kalna a ni a, nuam a ti angreng hle mai a, eng eng emaw sawiin an ti ti dun zel a, ATC atang chuan chhuk thlain reilo te hnu ah chuan Rsa kalpui duhna tak Prayer Mountain chu a thlenpui ta a. Melenie chuan “Rs, helai hmun hi ava nuam ve a, enge kan tih dawn” a ti a. Rsa chuan “ Melenie khung in te tak te te awm fir fer khu mi ten Pathian an auhna thin a ni a, keini pawh zanin  chu hemi hmun ah hian theitawpin Pathian kan au anga, kan manganna te a hnen ah kan thlen dun dawn nia” a ti a.  Melenie chuan “ Awi, tawngtai dan tur pawh ka hre ve lo ang, mahse i tih tlat chuan keipawn tawngtai chu ka duh alawm” a ti ve mai a.

Tichuan In te pakhat ah chuan an lut dun a, Rsa chuan Bible te a chhiar zawh chuan “ Melenie zanin ah hian theitawpin Pathian kan au dun anga, tawngtai thiam kher a ngai lo a, Pathian hnen ah amah i mamawh zia te, ilo tih sual palh tawhna avanga ngaihdam dilna te i nei anga, tun atang chuan a ta ni tawh turin inhlan i tum dawn nia, amah I duh tlat chuan a chhang em em ang che” tiin a fuih a. “ A hmasain keiman tawngtaina hun ka nei phawt anga, ka tawngtai zawh ah, kan pahnih in theitawpa ringin kan tawngtai dun nghal dawn nia” a ti a. Tichuan Rsa chuan a zan hun hman tur te leh an mahni chu Pathian hnen ah hlanin a tawngtai a, a zawh hnu chuan Melenie nen chuan an tawngtai dun ta a. An tawngtai tui dun kher mai a, Melenei pawh tap zawih zawihin Pathian a au a, chutiang bawkin Rsa pawn Melenie tan chuan a tawngtai sak bawk a. Hemi zan hian Melenie pawhin Hnenha puangin Pathian hnenah dam chhunga ama rawngbawl turin a inhlan ta a. An tui dun bawk a, an tawngtai tawp ber an zawh fel a, haw an tum chuan dar 1 alo ri dawn thuak tawh a. Tichuan an haw dun ta a, an kalkawng tluan chuan Pathian ropui zia an sawi dun a, Melenie pawhin enge mawni zawng taka a hlim ruk veng veng thu Rsa chu a hrilh a, Rsa pawh a lawm a, an haw kawng ah chuan an hlim dun ngei mai. Melenie te in an thlen hnu chuan Rsa chu chawl khawmuang tawh loin a haw tlang nghal a, an In a thlen fel meuh chuan dar 2 alo ri dawn hnai der tawh mai a. Pathian hnena lawmthu sawina te neia a inhlan zawh hnua chuan a mu zui ta a.

Melenie pawh Pathian hnen ah lawmthu sawina te neiin a duh ang anga a hman turin a intiam a, mut a tum ve ta a. Mahse a muhil thei hauh lo thung a, a rilru ah Rsa chu a awm tlut tlut a, a ngaisanga zahawm a ti em em bawk a, amaha Krista nun eng chhuak chu hmuhnawm a ti a. A sawia sawi ringawt lo a, a tak ngeia a nun pui chu ropui a ti em em a, amah ah entawn tur a awm miau avang leh Pathian chu a tih tak tak avanga ama ngei pawhin Pathian ah lawmna thar a hmu leh ta te chu ropui a ti, hetiang tlangval hi he Zoram hian ava mamawh hnem tak em vele aw tiin a ngaihtuah neuh neuh a,  tichuan eng eng emaw ngaihtuahneuh neuh chung chuan a muhil zui ve ta a.

( Midangte harsatna siam belh chhah sak tu nge kan nih a, mite an harsatna hmun atanga khai chhuak tu kan nih tih hi i in zawt nawn theuh ang u. Midang te tan malsawmna ni theuh turin Pathianin Malsawm vek che u rawh se.)